BAGUIO CITY – Nakemmeg ti dua nga estudyante kalpasan a nalapdanda iti panangibiyaheda koma iti nasurok P700k ti gatadna a marijuana iti police checkpoint sadiay Lubuagan, Kalinga
Nabigbig dagitoy a da Michael John Pascual, residente ti Kataggaman, Nuevo, Tuguegarao City kenni Kane Brandley Salang-oy a residente ti Purok 5, Bulanao, Tabuk City; agpada nga agtawen iti 21.
Iti report ti Lubuagan Municipal Police Station, nakalugan dagiti nadakamat nga indibidual iti nalabbaga a kotse a nangilugananda kadagiti kontrabando a maibiyahe koma paruar iti probinsia.
Nupay kasta, nakaawat iti impormasion ti pulisya seknan iti operasion dagiti estudyate isu’t gapuna a pinara dagitoy dagiti otoridad.
Nakumpiskar kadakuada ti tallo a tubular ti napagango a marijuana nga aggatad iti P380,400 ken tallo a marijuana bricks nga aggatad met iti P333,600.
Naala pay iti operasion ti dua a pidaso ti small tubular forms a nanglaon iti marijuana nga aggatad iti P10,800.
Naduktalan a saan a daytoy ti umuna a gundaway a natiliw ni Pascual gaputta siguden a natiliw iti kapada nga operasion.
Adda met itan iti kostudiya ti Lubuagan Municipal Police Station dagiti natiliw nga indibidual.
