BAGUIO CITY- Inaklon dagiti jeepney drivers ken operators a saan unay a naragsakan dagitoy iti dua pesos a kanayonan a plete a pinatgan ti Land Transportation Franchising and Regulatory Board (LTFRB).
Iti pannakiuman ti Bombo Radyo Baguio, kinuna ni Wilson Bumay-et, presidente ti jeepney federation iti Baguio-Benguet, maiyaplikar laeng ti P2 a kanayonan a plete iti umuna laeng nga uppat a kilometro ken saanen a maiyaplikar iti sumarsaruno a kilometro.
Impeksana a gapu iti daytoy ket kasla agpada laeng ti plete iti short trip ken long trip banag a saan a patas para kadagiti pasahero.
Inlawlawagna a ti P9 nga agdama a plete iti short trip ket mapagbalin nga P11 bayat a ti plete iti long trip ket saan a manayonan.
Mangnamnama met ni Bumay-et a nayonan pay ti LTFRB ti P2 a kanayonan a plete nangruna nu agtultuloy ti panagngato ti presyo ti produkto a petrolyo kadagiti sumarsaruno a lawas.
Maipalagip a nabayagen a kiniddaw dagiti jeepney drivers ti P5 agingga P6 a kanayonan a plete gapu iti nangina unay a presyo ti produkto a petrolyo.
Nupay kasta, idi laeng kalman ket inwaragawag ti LTFRB a manay0nan iti P2 ti minimum a plete kadagiti jeep.
Ag-epektibo ti nasao a pammilin, mangrugi inton bigat, Hulyo 1, nu sadino P11 ti minimum a plete kadagiti tradisyonal a jeep bayat a P13 met kadagiti moderno a jeep.
