Nasurok duapulo a Pilipino a maatap a karaman iti iligal nga aktibidad ti naipasubli manipod idiay Estados Unidos, sigun kenni Philippine Ambassador to the US Jose Romualdez.
Inlawlawag ni Romualdez a saan a serioso a krimen ti inaramidda ngem karamanda laeng iti sumagmamano a kriminal nga aktibidad iti nasao a pagilian isut rason a naisubli dagitoy.
Maipalagip nga idi Enero baente, kinuna ni Romualdez a dagiti immigrants nga addaan ti criminal records, karaman ti 1.3 million immigrants a maiproproseso, ket prayoridad para iti deportasion.
Daytoy ket kalpasan ti re-election ni United States President Donald Trump, a nagkari a mangipataw ti strikto a gakat kontra kadagiti iligal nga agnanaed idiay Estados Unidos.
Maipalagip nga impasiguradona pay a mapasamak ti mass deportation kadagiti illegal aliens babaen iti tulong dagiti suldado.
Maibasar iti 2022 a datos manipud iti US Department of Homeland Security, adda 350,000 nga illegal immigrants manipud iti Pilipinas.
Maikalima ti Pilipinas kadagiti pagilian nga addaan iti kaaduan nga illegal immigrants, sarunuen ti Honduras nga addaan iti 560,000.
Idi Nobiembre idi napalabas a tawen, inwaragawag ti Department of Migrant Workers ti planoda a tumulong iti nasurok a 300,000 nga awan dokumentona a Pilipino iti U.S. a mabalin a maipasubli iti Pilipinas.
