Saan pay a mataltalantan ita ti maipapan iti Charter Change (Cha-Cha)wenno ti proseso iti panakaamyendar ti 1987 Constitution.
Sigun kenni Palace Press Officer Undersecretary Claire Castro, nakatutok ita ni President Ferdinand Marcos Jr. iti ekonomiya ti Pilipinas nu sadino,ti maipapan iti daytoy ti tinalantanda bayat ti kaudian a panakitaripnongna iti economic team ti pagilian.
Daytoy nga impakaammo ni Castro ket kasaruno ti panangipeksa ni Senate President Vicente “Tito” Sotto III a suportaranna ti panakaisakad ti Charter Change.
Kasaruno metlaeng daytoy ti inruar ti Korte Suprema a pangngeddeng kadagiti articles of impeachment kontra kenni Vice President Sara Duterte.
Patien ni Senator Sotto a nalawag a panakibiang iti bileg ti lehislatura ti inaramid ti nasao a korte seknan iti proseso ti impeachment a sigun kenkuana ket eksklusibo a pagrebbengan laeng ti Kongreso.
Innayonna a gapu iti nagbalin a desisyon ti nasao a korte ket arigna nga inamyendaranna metlaeng ti agdama a Konstitusyon.
Kabayatanna, inlawlawag ni Undersecretary Castro nga iti kanito a makaaramid dagiti manmanday-linteg ti tignay para iti Cha-Cha, adalen a naimbag daytoy ti presidente.
