BAGUIO CITY – Naituding nga ipila ni Kalinga Vice Governor James Edduba ti maysa nga election protest kontra iti panangabak ti nakalabanna iti kinagobernador iti probinsia iti kaleppas a midterm elections a ni Tabuk Mayor Ferdinand Tubban.
Iti panakiyuman ti Bombo Radyo Baguio, kinuna ni Edduba nga ipilana ita nga aldaw ti Biyernes, May 24 ti nasao nga election protest iti opisina ti Legal Division iti COMELEC Central Office sadiay Intramuros, Manila.
Nagramot ti election protest iti 10-vote difference iti nagbaetanda kenni Tubban a naideklara a governor-elect ti Kalinga.
Immuna iti daytoy, indauluan ni Edduba ti bilang dagiti botos ngem naartapan daytoy ni Tubban.
Maibasar iti resulta, nakaala ni Tubban iti 39,148 a botos, nangatngato iti sangapulo a botos no iti naala ni Edduba a 39,138 a botos.
Kinuna ni Edduba a kiddawen ti kampona ti recount wenno panakabilang manen dagiti botos iti sumagmamano a paset ti probinsada.
Dinakamatna a binagaannan dagiti supporters ken volunteers-na a bay-andan ti resulta gaputa nabannogen daytoy ngem impetteng dagiti supporters ken volunteers-na ti recount gaputa kayat dagitoy a maamuan no anya ti napasamak.
Tarigagay dagiti supporters ken volunteers ti bise gobernador a pagpalawagen dagiti maseknan mainaig iti mapukpukaw a 25 a balota ken iti naitantan a transmittal dagiti resulta manipud sadiay Sucbot, Pinukpuk a maibagbaga a nangbaliw iti resulta ti eleksion.
Impalawag metten ni Kalinga Provincial Election Supervisor Atty. Ricardo Lampac a ti panakaitantan ti transmission manipud iti Barangay Sucbot ket gapu iti parikut iti vote counting machine a nagresulta iti panakasukat daytoy.
