BAGUIO CITY – Nagpaayab ni Benguet Governor Melchor Diclas iti emergency meeting ita nga aldaw tapno mapagsasaritaan dagiti pamay-an tapno maliklikan ti karkaro a panagwaras ti COVID-19 iti probinsia.
Daytoy ket kalpasan a nairekord idi kalman ti 93 a kabarbaro a kaso ti nasao a virus sadiay Benguet.
Daytoyen ti kangatuan a kaso ti COVID-19 a nailista sadiay Benguet iti las-ud laeng ti maysa nga aldaw.
Malaksid kadagiti positibo a kaso, nairekord idi kalman sadiay Benguet ti 12 a nakarekober manipud iti nasao a sakit ken maysa ti pimmusay.
Manipud kadagiti positibo a kaso, 74 ti manipud Itogon, 14 manipud La Trinidad, sag dua ti Tuba ken Buguias ken maysa sadiay Sablan.
Pimmusay ti maysa a pasiente a lalaki nga agtawen iti 67 manipud Buguias ken daytoy ket addaan iti sabali a sakit kas iti electrolyte imbalance ken diabetes, malaksid pay iti COVID-19.
Iti agdama ket addan ti 714 a pakabuklan a kaso ti COVID-19 iti probinsia ti Benguet, 378 dagiti naimbagan ken siam dagiti pimmusay.