Ad-adalen pailaeng ti gobyerno ti Pilipinas ti kiddaw ti Estados Unidos nga agserbi ti pagilian kas ‘processing center’ dagiti Afghan nationals a mapukawan ti pagnaedan sakbay nga alaen ti Estados Unidos.
Sigun kenni Justice Undersecretary Raul Vasquez, nakalukat ti gobyerno ti Pilipinas iti ideya ti Estados Unidos ngem nasken pay a maadal daytoy a nalaing tapno saan a maikompromiso ti seguridad ti pagilian.
Immunan nga inwaragawag ni Foreign Secretary Enrique Manalo a kiniddaw ti Estados Unidos idi Oktobre 2022 ti panagbalin ti Pilipinas kas ‘processing center’ babaen iti panangipatulodda ti “concept note” kenni Philippine Ambassador to Washington Jose Manuel Romualdez.
Sigun kenni Manalo, dagiti Afghan a saan a maikonsidera a refugee ket agtalinaed iti Pilipinas iti agarup dua a lawas bayat ti panag-ur-urayda iti panang-aprubar ti Estados Unidos iti special immigration visas dagitoy sakbayda nga alaen idiay Estados Unidos.
Innayon ni Manalo a baklayen ti gobyerno ti Estados Unidos dagiti gastos iti panagtalinnaed dagiti Afghan nationals iti pagilian.
Inlawlawag met ni Philippine Ambassador to Washington Jose Manuel Romualdez a dagiti Afghan nationals ket dagiti sigud ken agdama nga agtrabtrabaho idiay Afghanistan pakairamanan dagiti pamilyada.
