BAGUIO CITY – Nangrugin ti experimental traffic scheme iti deppaar ti Harrison Road, Baguio City babaen iti panangidaulo dagiti estudyante ti Civil Engineering iti maysa nga unibersidad ditoy siudad ken iti panakitinnulong ti Traffic Enforcement Unit ti Baguio City PNP.
Iti panakiyuman ti Bombo Radyo kenni Police Major Oliver Panabang, dadaulo ti nasao nga unit ti pulisya, adalen ken obserbaranda ti sitwasyon ti trapiko iti nasao a kalsada.
Kinunana a no epektibo ti nasao nga experimental traffic scheme ket posible nga adaptarenda daytoy para iti panakapasayaat ti taray ti trapiko ditoy City of Pines.
Maibasar iti scheme, maipawil ti agparada iti deppaar ti outermost lane iti Harrison Road manipud iti dakkel a supertmart wenno iti nagsabatan ti Perfecto Street ken Harrison Road agingga iti Baguio Patriotic High School wenno iti nagsabatan ti Calderon Street/66th Infantry Loop ken Harrison Road.
Agserbi a designated loading ken unloading area ti outermost lane manipud nagsabatan ti Perfecto Street ken Harrison Road agingga iti nagsabatan ti Lower Mabini Street ken Harrison Road.
Innayonna a saan a maipalubos ti panagparada iti pedestrian crossings ken intersections iti Harrison Road.
Sigun pay kenni Major Panabang, napintas ti nasao a panagadal gaputa marikna ti nalukay a taray ti trapiko iti sangwanan ti nasao a supermart.
Awan pay ti pinal a petsa no kaano a maileppas ti nasao nga experimental traffic scheme.
