Inaprobaranen ti Senado iti maikatlo ken maudi a pannakabasa ti singasing nga E-Governance Act, maysa a prioridad a gakat ti administrasion ni Marcos.
Naipasa ti Senate Bill 2781 nga addaan iti 21 nga afirmative votes, zero negative votes, ken zero abstentions.
Sigun kenni Senador Alan Peter Cayetano, sponsor ti gakat, ti singasing a linteg ket panggepna a mapasayaat dagiti proseso ti gobierno ken ad-adda a transparent para iti unified digital government system.
Ti Department of Information and Communications Technology ti kangrunaan a departamento a mangaywan iti framework ken mangigiya kadagiti dadduma nga ahensia ti gobierno kadagiti teknikal ken dadduma pay a pagalagadan a kasapulanda nga anamongan para iti awan pagkuranganna a digital integration.
Ti E-Governance Act ket maysa kadagiti gakat ni President Ferdinand “Bongbong” Marcos Jr. a dinakamatna bayat ti umuna nga State of the Nation Address.
Ti gakat ken naaprobaran iti Senado sakbay nga agleppas ti maikasangapulo ket siam a Kongreso.
Ti kapada a gakat a naipila iti House of Representatives ket naaprobaran iti maikatlo ken maudi a pannakaibasana sakbay ti Holy Week idi napalabas a tawen.
