BAGUIO CITY – Inlawlawag ni Atty. Rocky Balisong, Legal Counsel ni General Gerald Bantag, a saanda nga agipila ti counter affidavit agingga nga awan ti maawatda a subpoena.
Iti interview ti Bombo Radyo Baguio, kinuna ni Atty. Balisong, saanna a masungbatan nu aniya ti motibo dagiti opisyales a mang-ak-akusar kenni General Bantag a mastermind iti panakapapatay daydi radio broadcaster Percy Lapid agingga nga awan ti subpoena a maipama kadakuada.
Impetteng ni Atty. Balisong a saan nga aglemlemmeng ni General Bantag ken awan ti planona nga aglibas iti pagilian gaputa nakasagana daytoy a mangsango kadagiti akusasyon a maibatbato kenkuana.
Kinumpirmar met ni Atty. Balisong nga adda ni General Bantag iti Baguio City para iti seguridadna.
Inlawlawagna a nasken met a salwadan ni General Bantag ti bagina nangruna ta ado ti binanggana a drug lords ken dadakkel a personalidad iti uneg ti New Bilid Prison.
Sigun kenni Atty. Balisong, awan ti naaw-awat ni General Bantag a pangta iti biagna ngem adda dagiti makitkitana a mapagduaduaan nga agwanwanawan iti aniaman a pappananna.
Maipalagip a sinuspendir ni Justice Secretary Jesus Crispin Remulla ni General Gerald Bantag kas Director ti Bureau of Corrections idi napan a bulan kasaruno ti akusasyon nga isuna ti mastermind iti ipupusay daydi radio broadcaster Lapid.
Inaklon met ni Atty. Balisong a naklaat ken nadismaya ni General Bantag idi isuna ti itudtudoda a mastermind iti nasao a krimen.
Innayon pay ni Atty. Balisong a sakbay pay a napasamak ti krimen ket ipalpalapayagdan idi Agosto a sukaten ni retired Lieutenant General Gregorio Pio Catapang ni General Bantag kas Director ti BuCor
Impaganetget met ni General Bantag nga awan ti parikut iti daytoy nu isu ti desisyon ni President Bongbong Marcos Jr.
