Maisagsaganan ti kaso a maipila kontra iti maysa a geodetic engineer nga empleyado ti gobyerno kalpasan a nakumpiskar iti uneg ti pagtaenganna ti sumagmamano a pakete ti iligal a droga ken maysa a paltog iti naipatungpal a search warrant idiay Brgy. Bantay, Paracelis, Mountain Province itay nabiit.
Ti suspek ket maysa a geodetic engineer iti Local Government Unit ti Paracelis engineering office ken ibilbilang ti pulisya kas High Value Individual.
Nakumpiskar manipud kenkuana ti dua a pakete ti maatap a shabu nga aggatad ti agarup P90,000, maysa a caliber 22 pistol ken dadduma pay a drug paraphernalia.
Iti interview ti Bombo Radyo Cauayan kenni PCapt. Alvaro Secligen, Chief of Police ti Paracelis Municipal Police Station, sakbay nga impatungpalda ti operasyon ket nabayagen a bambantayanda ti suspek agingga a nakaalada ti kanayonan nga impormasyon manipud kadagiti residente iti nasao a lugar.
Nagkedked met ti suspek a mangipaay ti impormasyon.
