Napaneknekan a “liable” ti Google ken Meta iti panagdisenio iti platform a napeggad para kadagiti ubbing ken agtutubo, sigun iti panggedeng iti korte idiay Estados Unidos.
Gapu iti dayta, agmulta ti Meta iti $4.2 milion ken ti Google iti $1.8 milion kalpasan a napaneknekan a binaybay-anda ti disenio iti apps wenno application ken saan a nagballaag iti posible a peggad daytoy.
Nagramut ti kaso iti reklamo iti maysa a babai a nangibaga a naadik daytoy iti YouTube ken Instagram gapu iti “attention-grabbing” a disensio.
Numan pay bassit ti multa nu idilig iti kinadakkel ti kompania, maibagbaga a mabalin a mangitunda daytoy iti naing-inget a pagalagadan iti social media.
Saan nga immanugot ti Meta ken Google iti nasao a desision ken panggepda a mangipila iti apela.
