PHILIPPINES – Nagballaag ti maysa a grupo dagiti mangngalap kontra iti posible a ‘no-sail zone’ kadagiti baybay a kaipatungpalan ti 19-day a US-Philippine Balikatan exercises.
Sigun kenni Fernando Hicap, PAMALAKAYA National Chairperson, rumbeng a bantayan ti aniaman a pangta a mangideklara iti fishing ban tapno maipaayan ti gundaway ti Balikatan exercises gapu ta maapektaran ti pagbiagan dagiti mangngalap.
Kasaruno daytoy ti panagamakda iti napasamak idi napalabas a tawen nu sadino nangipaulog ti Ilocos Norte provincial board ti resolusyon para iti panakai-relocate dagiti mangngalap sadiay Burgos, Pagudpud, Bangui, Pasuquin, Bacarra, Paoay, Currimao, Badoc ken Laoag para laeng iti nasao nga exercises.
Maibasar iti datus ti PAMALAKAYA, dumanon iti 13,800 registered fisherfolk ti naapektaran iti no-sail zone order kadagiti nasao a lugar.
Maipalagip a nagrugi ti joint military drills a buklen ti 16,000 a militar a Pilipino ken Amerikano nu sadino agpaut agingga Mayo 10 ken manamnama nga agrikus dagito sadiay Palawan, Batanes Zambales ken Ilocos Norte.
Immunan a kinuna ti Armed Forces of the Philippines (AFP) a makipaset dagiti tropang Pinoy ken Kano iti sumagmamano a maritime live-fire exercises inton Mayo 8 sadiay Ilocos Norte.
Manamnama pay a pakipasetan ti militar ken naval forces ti Australia ken France ti maika-39 a joint exercise ita a tawen.
