Impaganetget iti pannakangiwat ni Atty. Manases Carpio a ni Atty. Harlin Neil Abayon III a saan a saklawen iti exception iti Bank Secrecy Law ti naaramid nga impeachment hearings iti Kamara kontra kenni Vice President Sara Duterte.
Sigun kenni Abayon, ti House ket adda iti “initiation stage” paylaeng iti impeachment ken saan pay daytoy a maibilang nga impeachment court, isut gapuna a mabalin a saan daytoy a saklawen dagiti probision a mangipalubos iti panangiruar iti bank records.
Inaramatna kas pagarigan dagiti immuna nga impeachment proceedings a kas iti kaso ni sigud a Chief Justice Renato Corona, nu sadinno iti Senado laeng a natalantan ti bank records kas impeachment court.
Kagiddan iti daytoy, kinuwestion iti kampo ni Carpio ti panangiruar iti mapapati a bank transactions a dumanon iti P6.77 bilion a mainaig kenkuana ken ni Vice President Duterte iti uneg iti dandani duapulo a tawen.
Pinilaan metlaeng ni Carpio iti kaso dagiti sumagmamano nga opisial iti Bangko Sentral ng Pilipinas, Anti-Money Laundering Council, ken sumagmamano a mammanday-linteg iti House Justice Committee gapu iti mapapati a panaglabsing iti Anti-Money Laundering Act, Bank Secrecy Law, ken Data Privacy Act.
Impaganetget iti kampo nga awan ti panagaklon ni Carpio kadagiti akusasion ken inlabanna laeng ti karbenganna iti confidentiality ken due process bayat nga agtultuloy pay ti isyu iti impeachment complaints.
