Agtultuloy latta ti kiddaw dagiti pamilia ti biktima ken ti National Union of Journalists of the Philippines (NUJP) a hustisia kagiddan ti pananglagipda iti maika-sangapulo ket lima nga anibersario ti Maguindanao Massacre idi kalman.
Sigun iti National Union of Journalists of the Philippines (NUJP), kiddawda ti hustisia gaputa dagiti pannakakonbiktar iti kaso ket naipaulog maysa a dekada kalpasan ti massacre, ken adda pay laeng iti apela, kayatna a sawen nga adda ti tsansa a mabalin a mabaliktad ti kaso.
Ti masaker ket nakatayan ti biag ti 58 a tattao, pakairamanan ti 32 a journalists a nangkadua ti asawa ni daydi Buluan, Maguindanao vice mayor Esmael Mangudadatu ken dagiti mangsupsuporta kenkuana iti panangipila ti kandidaturana para kinagobernador.
Ni Mangudadatu ket kalaban ni daydi Andal Ampatuan Jr. iti kinagobernador idi 2010.
Idi Disiembre 2019, nakonbiktar ti adu a tattao a karaman iti masscre pakairamanan ni Andal Ampatuan Jr., sigud nga Anwar Sajid “Ulo” Ampatuan ken kaaduan a police officers.
Imbilin pay ti korte a bayadanda ti minilmilion a pesos ti danyos ken napukaw a kuarta kadagiti tunggal biktima malaksid iti photojournalist a ni Reynaldo “Bebot” Momay, ti maika-lima pulo ket walo a biktima ti masscre a saan a nasarakanen ti bangkayna.
Kabayatanna, sigun met iti pamilia ti biktima a ni Mangundadatu, agtalinaed nga aktiboda a mangkiddaw ti hustisia.
Idiay Metro Manila, nangmartsa dagiti aktibista nga studiante manipod College Editors Guild of the Philippines (CEGP) paturong idiay Mendiola tapno lagipen ti panagatake kontra kadagiti journalist iti Pilipinas.
Impeksa met ti Presidential Task Force on Media Security (PTFoMS) a ti sakripisio dagiti biktima iti masscre ket saan a malipatan.
