BAGUIO CITY – Nakemmeg manen ti maysa a High Value Individual (HVI) ken ti kadwana iti buy-bust operation nga insayangkat dagiti otoridad sadiay Balakbak, Poblacion, Buguias, Benguet idi kanikadua.
Nabigbig ti HVI a ni Efren Guillao Olsim, 43-anyos ken ti kadwana a ni Greg Ba-oy, 36-anyos, agpada a mannalon ken residente ti Poblacion, Buguias, Benguet.
Nakumpiskar kadakuada ti tallo a pakete ti maatap a shabu nga agdagsen amin ti 1.7 grams ken aggatad ti P11,560.
Nakumpiskar pay kadagiti dua ti nagduduma a drug paraphernalia bayat a narekober ti naaramat a buy-bust money.
Sumangsango metten da Olsim ken Ba-oy iti kaso a panaglabsing iti RA 9165 wenno iti Comprehensive Dangerous Drugs Act of 2002.
Maibasar iti rekord, nakemmeg ni Olsim idi March 2014 kalpasan ti sumagmamano a bulan a panaglemmengna manipud nakalibas iti operasyon dagiti otoridad a nakakemmegan ti kabsatna.
