BAGUIO CITY – Nagballigi dagiti tallo a Cordilleran MMA fighters bayat a naabak ti kakaisuna a lady fighter a kadwa dagitoy a limmaban iti ONE Warrior Series 7 a naangay sadiay Singapore idi rabii.
Nagun-od ni Team Lakay rising star Lito Adiwang ti ‘Bout of the Night’ ken ti kontrata iti ONE Championship kalpasan nga inabakna ni Anthony Do manipud Vietnam iti main event ti fight card.
Nangabak ni Adiwang babaen iti unanimous decision.
Kabayatanna, nangabak met ni Ismael Bandiwan manipud Tribal Submission kontra kenni Adib Sulaiman ti Brunei babaen iti technical knockout kalpasan a dinandanogna ni Sulaiman iti maikatlo a rikos ti laban dagitoy.
Inabak met ni Dave Bangguigui manipud Fight Corps MMA ni Alber Correia Da Silva ti Brazil babaen iti submission partikular ti rear-naked choke iti maikadua a rikos ti laban dagitoy.
Nupay kasta, naabak ti lady fighter a ni Jenelyn Olsim manipud Team Tribal Torogi iti labanda kenni Caitlin McEwen ti Australia babaen iti submission partikular ti armbar iti umuna a rikos ti laban dagitoy.
