BAGUIO CITY – Agbalin a parikot kadagiti drivers dagiti parapasahero a jeep iti lokalidad ti panagsukimat no nabakunaan wenno saan dagiti mailugluganda a pasahero tunggal agbiaheda.
Imbinsa-binsa daytoy ni Miguel Luma-ang, chairman ti Benguet Operators and Drivers Association iti interview ti Bombo Radyo Baguio mainaig iti polisiya a “No Vaccine, No Ride” kadagiti parapasahero a jeep.
Sigun kenkuana, marigatanto dagiti drivers a mang-asikaso ken mangsukimat no adda ken umno ti vaccination card wenno certificate nga iparang dagiti pasahero iti kanito a maipatungpal ti nasao a polisiya.
Impettengna a karit ti implementasyon ti polisiya a “No Vaccine, No Ride” kadagiti parapasahero a jeep gaputa awan met ti triage area kadagiti paradaan dagiti jeep.
Nupay kasta, inaklonna nga awan ti maaramidda iti kanito a maipatungpal ti nasao a polisiya kabayatan ti panagbiaheda.
Mainaig iti dayta, imbinglayna nga amin a miembro ti transport group dagitoy nga agbibiahe paturong iti Baguio ket nabakunaanen kontra iti COVID-19.
Naamuan a dagusda a nagpabakuna kalpasan a naipaulog ti pagalagadan iti Baguio a “No Vaccine, No Biyahe” iti amakda a saanda a mapalubosan a makastrek iti siudad ti imanmanehoda a lugan.
