Patien ti Department of Social Welfare and Development nga “inflation” ken agsasaruno a bagyo ti kangrunaan a rason ti umad-adu a bilang dagiti pamilia a Pilipino a makapaspasar iti bisin.
Daytoy ket sungbat ni DSWD Assistant Secretary Irene Dumlao iti kaudian a survey ti Stratbase-Social Weather Stations, a ngimmato ti bilang dagiti napanglaw a pamilia a Pilipino nga agsagsagaba iti bisin manipud 26.4% idi Pebrero agingga iti 35.6% idi Marso 2025.
Naiparang iti datos ti pakabuklan a bisin—a pakairamanan ti “moderate” ken “severe hunger”— nga agtaltalinaed a ngumatngato sipud pay idi Enero 2025 idi nairekord daytoy iti 22.3% kadagiti self-identified poor households.
Ngimmato metlaeng ti bisin kadagiti non-poor families, manipod 16.2% idi Pebrero agingga 18.3% idi Marso.
Impaganetget ni Dumlao a ti bisin ken kinapanglaw iti pagilian ket gapu iti nagduduma a “factor”, a nangtignay iti DSWD a mangadaptar iti komprehensibo nga estratehia a mangtaming kadagitoy.
Tapno marisut ti nasao a karit, kinuna ni Dumlao a pasayaaten ti gobierno dagiti programana nga intervention, pakairamanan ti Pantawid Pamilyang Pilipino Program (4Ps) ken ti Assistance to Individuals in Crisis Situations (AICS).
