BAGUIO CITY – Panggep ti lokal a gobyerno ti Itogon, Benguet a mangipatungpal iti maysa a ritwal kagiddan iti panakalagip ti nakaam-ames nga epekto ti panagdalapos ti bagyo nga Ompong idi September 15 idi napalabas a tawen.
Iti panakiyuman ti Bombo Radyo kenni Itogon Mayor Victorio Palangdan, kinunana a manarimaan ti panakaplano ti nasao nga aktibidad.
Innayonna a babaen iti ritwal ket maipalagip kadagiti umili ti panag-annadda tunggal panawen ti kalamidad tapno maliklikan a maulit ti insidente.
Mainaig iti daytoy, dinakamatna nga agtultuloy latta ti panangipaayda iti tulong kadagiti naapektaran iti nasao a kalamidad.
Kinunana nga addan ti pondo a P14-M para iti relokasyon dagiti naawanan ti pagtaengan.
Nupay kasta, inaklonna nga awan pay ti inrekomendar ti Mines and Geosciences Bureau a natalged a lugar iti masakupan ti Itogon a pag-akaran dagiti apektado ken masapul nga agbiruk ti LGU iti ruar ti munisipyo.
Maipalagip nga iti idadalapos ti TY Ompong sadiay Itogon idi napalabas a tawen ket dumanon iti agarup sangagasut nga indibidual ti pimmusay. (-with Bombo Brigitte Marcasi)
