![](https://img.bomboradyo.com/baguio/2021/07/PINTEREST.jpg)
BAGUIO CITY – Agtaltalinaed a parikot ti kaawan ti care shelter para kadagiti indibidual nga agkatangkatang wenno awanan ti pagtaengan ditoy siudad ti Baguio.
Sigun kenni Nurse Ricky Ducas, mental health responder ti City Health Services Office, ikagkagumaanda ti makabiruk ita iti agserbi a shelter dagiti nasao nga indibidual babaen iti panagkiddawda ti tulong kadagiti nagduduma nga institusyon.
Kinunana nga addan ti na-rescue dagitoy kadagiti kalkalsada ditoy siudad nga impaayanda ti psychological assistance a nakatulong iti panagrekober dagiti nasao nga indibidual ngem saanen nga inawat ti bukkodda a pamilya.
Dinakamat ni Ducas nga adda ti shelter nga indiaya ti City Social Welfare and Development Office a pagdagusan dagiti nasao nga indibidual ngem limitado laeng ti aldaw a panagtalinaed dagitoy sadiay ken nasken pay a maipasidongda iti COVID-19 test ken panagbakuna kontra iti COVID-19.
Nupay kasta, mangnamnamada latta a makasarakda metlaeng ti shelter para kadagiti nasao nga indibidual iti kabiitan a panawen.