Impakaamo ti Armed Forces of the Philippines (AFP) nga agtalinaed latta ti operasionda iti seguridad ita a bakasion kalpasan nga nga indeklara ti Communist Party of the Philippines (CPP) ken ti New People’s Army (NPA) a saanda nga aginana iti labanda kontra ti gobierno ita a tawen.
Sigun kenni AFP spokesperson Colonel Francel Padilla, agtultuloy ti operasion dagitoy ken panangipatungpal ti nagduduma nga addang para iti seguridad.
Karaman kadagiti operasionda ket ti checkpoints ken panangtaginayon ti talna ken urnos iti intero a pagilian.
Imbinglay pay ti nasao nga opisial ti dakkel a panagrang-ay iti pannakakessay ti kaadda ti NPA, nu sadinno bimmaba ti bilang dagiti aktibo a guerrilla fronts manipud 89 idi 2018 agingga iti maysa laeng a front iti agdama a tawen.
Nupay kasta, pinaglibakan daytoy ti Communist Party of the Philippines (CPP) ken inawaganda a “disinformation” ti banag a kimmapuy ti puersada.
Impasigurado met latta ni Padilla iti publiko a makitintinnulongda iti Philippine National Police (PNP) ken dadduma pay a pannakabagi ti linteg tapno maipasigurado ti kinatalged iti parapubliko a lugar a kas ti mall, simbaan, ken terminal bayat ti panawen ti bakasion.
Kabayatanna, inulit ni Defence Secretary Gilbert Teodoro nga awan ti ceasefire iti CPP-NPA, ken inladawanna ti katulagan a kas ceasefire kontra kadagiti terorista ken kriminal.
Iti agdama, awan pay ti aniaman a report a naawat ti AFP ken PNP a pangta.
