Nangipila ita nga aldaw ti kampo ni dismissed Bamban, Tarlac Mayor Alice Guo iti counter-affidavit iti kasona a “misrepresentation” a sangsanguenna iti Commission on Elections (Comelec).
Daytoy ket kalpasana ti sumagmamano nga aldaw a pannakaitantan ken pannakailaylayon.
Sigun kenni Comelec chairman George Garcia, naipila ti counter-affidavit iti agarup ala-una ti malem.
Nagtaud ti kaso kontra kenni Guo iti mapapati a panagulbodna a daytoy ket maysa a Filipino citizen kas maibasar iti voting record daytoy, iti laksid nga addaan daytoy ti Chinese national a Guo Hua Ping.
Kabayatanna, kinuna ni Garcia a saan laeng a ni Guo ti sumango iti kaso a misrepresentation nga adda pakainaiganna iti eleksion idi 2022.
Sigun kenkuana, inrekomendar ti Legal Department daytoy a mapilaan ti kaso dagiti lima nga indibidual a dadduma pay gapu iti maipagarup a saan nga umno a panangirepresentarda iti bagida idi nagkandidatoda iti opisina ti publiko idi 2022.
Kinuna pay ti opisial a pammaneknek a ti addang ket saan laeng a ni Guo ti maim-imbestigaran.
