Narekober dagiti maseknan nga otoridad ti sumagmamano a resibo ken dokumento manipud iti kompanya ken incorporators nga adda pakainaiganna kenni suspended Bamban, Tarlac Mayor Alice Guo iti maysa a resort sadiay Pampanga idi laeng kalman, Hulio a nuebe iti agdama a tawen.
Narekober dagiti nasao a dokumento iti maysa a 19 money vaults a nakaidulinan ti bank documents iti Baofu Land Development, ti firm a maipagarup a nainaig kenni Guo ken ti makinkukua iti daga a nakaisaadan ti naraut a Philippine Offshore Gaming Operators (POGO) hub idiay Bamban.
Malaksid iti dayta, narekober pay dagiti dokumento ti Chinese fugitive a ni Huang Zhiyang, dua a Taiwanese passport daytoy, photocopy ti dadduma a passport manipud iti uppat a pagilian, special retiree’s visa, dokumento dagiti Baofu incorporators a da Zhang Rujin ken Lin Baoying, a nairaman iti kaso a money laundering idiay Singapore ken dadduma pay.
Maipalagip nga inabangan dagiti “big bosses” ti naraut a pasilidad ti Zun Yuan Technology Philippine Offshore Gaming Operators (POGO) sadiay Bamban ken dagiti business partners ti nasuspende a mayor ti nasao a resort.
