BAGUIO CITY- Nakaawat manen ti lokal a gobierno ti Baguio City iti 3,440 a doses ti Sinovac ken 120 a doses ti Moderna vaccines manipod iti Department of Health
Sigun ken City Health Services Office head Dr. Rowena Galpo, gapu iti daytoy ket dumanonen ita ti 107, 647 a doses ti bakuna ti adda a suplay ti syudad.
Maibasar iti datos ti CHSO, adda iti nakasagana a 45,372 a Pfizer vaccines a maiwaras para kadagiti agtawen iti 12, 25,570 a Pfizer vaccines para kadagiti agtawen 5 agingga 11; 22,040 nga Astra-Zeneca; 8,415 a Sinovac; ken 6,250 a Moderna vaccines
Mainaig iti dayta, imbinsana a nangiwaras ti syudad iti 334 a hospital beds pakairaman ti 125 a naipaay iti Department of Education ken ti 100 beds a naipa-ima iti Baguio General Hospital and Medical Center.
Naipaayan pay ti Teachers Camp iti uppat, Baguio City Police Office iti 5; naduma-duma a health centers iti 30; ken babbarangay a naiwarasan iti 70 a hospital beds.
Inlawlawagna a dagiti hospitals beds ket nagtaod kadagiti sigud a Covid-19 isolation units a naipaserra kasaruno iti pannakaibaba ti kaso ti COVID19 ti syudad.
Ipampannakel pay ti CHSO ti panakagun-id ti siudad iti 100% vaccination rate kadagiti eligible population.
Iti datus, fully vaccinated dagiti 281,000 nga eligible adult population ti syudad kasaruno iti sumagmamano a bulan a panangipatungpalda iti vaccination drive babaen iti tulong dagiti health workers, opisyal ti syudad ken barangay.
Nailista metten ti 39.75% dagiti naipaayan ti booster shots manipod iti bilang dagiti fully vaccinated population.
Maibasar pay iti datos ti CHSO, dumanonen iti 34,741 wenno 86.34% ti nailista a fully vaccinated manipod iti 40,238 a target population dagiti ubbing nga agtawen iti 12 agingga 17; ken 36,285 wenno 90.18 percent met dagiti naipaayan iti first-dose ti bakuna iti kapada nga age group.
Iti met age group a 5 agingga 11, dumanonen iti 9,592 wenno 20.43% manipod iti target population a 46,955 dagiti naipaayan iti second dose bayat a 13,957 wenno 29.72% dagiti naipaayan laeng iti umuna a dose ti bakuna.
