BAGUIO CITY| Impanamnama ni Benguet Congressman Eric Go Yap ti kanayunan a tulong para ti panagsanay dagiti myembro ti Team Lakay para kadagiti sumaruno a laban ti bunggoy.
Kalpasan a naabak ni Joshua Pacio iti naudi a world title para iti Pilipinas iti One Championship, inkari ni Benguet Congressman Eric Go Yap, baro nga manager ti nadakamat a bunggoy, nga agbirok daytoy iti ad-adu pay a resources tapno matulongan ti Team Lakay a mangsubli iti championship belt-da.
Insigurado pay ti kongresista ti kanayunan nga tulong para ti panagsanay dagiti atleta saan laeng nga ditoy pagilyan nu di ket pati sadiay ballasiw-taaw.
Maipaayaan metlaeng ti bunggoy ti agduduma nga training equipments, bitamina ken suplementoda bayat ti panagsanay dagitoy.
Kinuna ni Mark Sangiao, agdama nga coach ti Team Lakay, dakkel a tulong ti ipappaay ni Congressman Yap kadagiti atleta tapno makafocus dagitoy ti panag ensayo da nangnangruna dagiti atleta nga addaanen ti pamilya.
Maipalagip nga idi Disiembre 3, naabak ni ni American Jarred Brooks ni Pacio ti strawweight title babaen ti unanimous decision iti main event ti panagsubli ti One Championship iti Manila kalpasan ti dua a tawen gapu iti pandemia.
Uppat metlaeng a Team Lakay fighters, da Eduard Folayang, Jenelyn Olsim, Geje Eustaquio ken new comer Adonis Sevellino met ti naabak kadagiti bukodda a kalaban sadiay Mall of Asia Arena.
Nupay kasta, intag-ay da Jeremy Pacatiw ken Jhanlou Sangiao ti bandera ti Team Lakay kalpasan a nagballigi da ken nakagun-od metlaeng dagitoy iti $50,000 a bonus.
Inted met ni Yap da Pacatiw ken Sangiao iti P100,000 a kuarta ti tunggal maysa nga inkarina kalpasan a simmarungkar iti bunggoy idi naglabas a bulan ti Nobiembre.
Mamati ti manmanday linteg nga babaen ti kanayonan a suporta iti Team Lakay, rumang-ay ti Mixed Martial Arts team ken a maala manen ti tituloda iti kabiitan a panawen.
