BAGUIO CITY – Ngumatngato ti bilang ti kaso ti African Swine Fever (ASF) sadiay Bontoc, Mountain Province.
Sigun kenni Bontoc Municipal Agriculturist Renato Falag-ey, nailista ti 197 a baboy ti naimpeksion ti ASF virus manipud October 2021 agingga February 9, 2022.
Kinunana a manipud iti nasao a bilang, 156 ti nailista sadiay Samoki, 27 sadiay Poblacion ken siyam sadiay Bontoc Ili.
Dagiti affected areas iti Barangay Samoki ket dagiti sitio ti Riverside, Khefa, Pawek, Sadlan, Khawana, Fagkhay, Attor, Sadlan ken Kalonglong bayat nga iti Barangay Poblacion ket ti Sitio Cheppay ken iti Barangay Bontoc Ili ket dagiti sitio ti Foyayeng, Pattig ken Sokok.
Gapu iti daytoy, iya-apela ti ASF Municipal Task Force ti Bontoc ti saan a panaggatang ti publiko iti sibibiag wenno napulpugan a baboy manipud kadagiti nabigbig nga ASF-affected areas sadiay tapnu malapdan ti iseserrek ti nasao a sakit iti barangay dagitoy.
Maipalpalagip pay ti saan a panangpakan dagiti backyard hog raisers iti tarakenda kadagiti arasaw a kangrunaan a rason iti panakaiwaras ti ASF.
Makidkiddaw pay ti nainget a panagtungpalda iti biosecurity protocols kontra iti ASF.
