Ngimmato iti agarup innem a ribu ti kaso ti dengue iti probinsia ti Benguet ita a tawen, no sadino nangatngato daytoy no idilig idi napalabas a tawen.
Maibasar iti data monitoring ti Provincial Epidemiology and Surveillance Unit ti Provincial Health Office, idi Enero a uno agingga Agosto baente kwatro iti agdama a tawen ket nakailista ti municipyo ti La Trinidad iti kangatuan a kaso a dumanon iti agarup sangaribu, sinaruno ti Kabayan a walo gasut; Itogon a pito gasut; Bokod, Tuba ken Mankayan a sag-walo gasut; Tublay a tallo gasut; Buguias ken Kapangan a sag-dua gasut; Sablan ken Atok a sag-sangagasut; Bakun a siam a pulo ket lima ken Kibungan a walo pulo.
Walo ti pimmusay, no sadino uppat idiay ti La Trinidad, saggaysa idiay Tublay, Bokod, Tuba ken Mankayan.
Iti agdama a bulan, dumanon iti agarup innem a gasut ti kaso ti nasao a sakit bayat nga awan ti nailista a pimmusay.
Agtutuloy met nga agpalpalagip ti Provincial Epidemiology and Surveillance Unit ti Provincial Health Office kadagiti umili iti Benguet a makikaykaysada para iti pannakapaksiyat ti panagraira ti kaso ti dengue iti nasao a probinsia.
Mapalpalagipan pay ti publiko nga ipatungpalda ti 5’S wenno ti Search and Destroy Mosquito Breeding sites, Seek Early Consultation, Secure Self Consultation ken Support Spraying wenno Fogging.
