Ngimmato iti 80% ti kaso iti dengue iti probinsia iti Benguet manipud Enero a uno angingga Hunio baente dose iti agdama a tawen, no sadino kangrunaan dagiti lallaki a naapektaran no idilig kadagiti babae.
Iti panakiyuman ti Bombo Radyo kenni Dr. Cham Bacoso, Medical Specialist ken dadaulo iti Public Health iti probinsia iti Benguet, kinunana a dumanon iti agarup sangaribu ti kaso iti nailista ita a tawen, no sadino nangat-ngato daytoy no idilig idi napalabas a tawen.
Innaklon ti nasao nga opisial a mapagdandanagan daytoy, isu’t gapuna a kasapulan a paingten ti panakaimplementar dagiti addang kas iti 5S wenno ti Search and destroy breeding sites; Self-protection manipud kadagiti mosquito bites; Seek early medical consultation; Support fogging ken Sustain hydration.
Nupay kasta, awan ti nailista iti agdama a pimmusay gapu iti nasao a sakit iti probinsia iti Benguet.//mp4
