BAGUIO CITY – Ngimmato ti kaso dagiti communicable diseases a nailista ti Benguet-Provincial Health Office (PHO) nu idilig kadagiti naglabas a tawen.
Iti interview ti Bombo Radyo Baguio, kinuna ni Provincial Health Officer Dra. Nora Ruiz a dumanonen iti 298 ti kaso ti dengue a nailista iti umuna a kwarter ti agdama a tawen.
Dinakamatna a kaadoan kadagiti nakaptan iti dengue dagiti agtawen iti sangapulo ket innem agingga tallo pulo.
Kangrunaan a rason ti saan a nadalusan a waig, basura dagiti asideg iti karayan ken dagiti pagmulaan ti sabong a maysa kadagiti pagbalbalayan ken pagit-itlogan dagiti lamok.
Gapu iti daytoy, inyunay-unay manen ni Ruiz ti panangdalus iti uneg ken aglawlaw ti pagtaengan nangruna ta mapaspasaran ita ti panagtutudo.
Inayonna a napateg ti panagsuot ti long sleeve a bado ken pantalon tapno saan a makagat iti lamok.
Sigun pay kenni Dra. Ruiz, ngimmato iti 27% ti kaso ti typhoid fever iti umuna a kwarter ti agdama a tawen gapu iti ipapauneg a taraon ken mainom kasta metten ti panagluto ti maysa a tao a saan a nagbuggo ti ima.
Gapu iti daytoy, inyunay-unaynan a nasaysayaat nu ipapudot pay dagiti nalamiis a taraon ken danum tapno mailiklik iti nasao a sakit.
Kabayatanna, bimmaba met ti kaso ti Tuberculosis a maal-ala metlaeng kadagiti ipapauneg a taraon.
Bimmaba metlaeng ti kaso ti acute bloody diarrhea iti 44% ken ti hand foot and mouth disease a resulta ti impeksion.
