BAGUIO CITY -Nainget ita ti koordinasyon ti City Social Welfare and Development Office (CSWDO) kadagiti nagduduma nga ahensia kagiddan ti ngumatngato a kaso wenno biktima ti Violence against women and their children (VAWC) iti Baguio City.
Sigun kenni CSWDO officer in charge Liza Bulayongan, makapa-alarma ti 29 a nailistada nga kaso ti VAWC iti nagduduma a paset ti rehiyon iti uumuna nga kwarter ti agdama a tawen.
Kaadoan kadagiti kaso a naiyuman iti ahensia ti pisikal, psychological, economic ken sekswal a panag-abuso ken dumandanon pay iti legal a proseso ti dadduma kadagitoy.
Karaman kadagiti inisyatibo ti CSWDO kadagiti biktima ti panakaipaay ti counselling kadagiti biktima karaman pay dagiti mismo a nang-abuso, temporary shelter kadagiti biktima ken tulong tapnu makarekoberda iti sangsangoenda a parikot.
Nu masukimatda met a maul-ulit ti aramid dagiti nang-abuso, maipatungpal ti barangay protection order tapnu maliklikan ti ad-ada pay a panang-abuso kadagiti biktima agingga a masolbar ti parikot iti relasyon dagitoy.
