BAGUIO CITY – Dimmalan iti siudad ti Baguio ti pasyente iti kaunaan a kaso ti Delta variant ti COVID-19 a residente ti Pudtol, Apayao.
Inaklon daytoy ni City Administrator Engr. Bonifacio dela Peña iti interview ti Bombo Radyo Baguio.
Kinunana a dimmalan wenno simrek ti nasao a pasyente ditoy siudad ken nagpataming sadiay Baguio General Hospital Medical Center.
Maipalagip a naimbagan metten ti nasao nga indibidual idi pay napalabas a bulan ti Hulyo.
Kinuna ni Engr. Dela Peña a naipatungpalen ti re-swabbing iti nasao nga indibidual.
Innayonna nga apaman a naawatda ti report ti Philippine Genome Center seknan iti panagpositibo ti specimen ti nasao nga indibidual iti Delta variant ti COVID-19 idi kalman ket dagusda a nangisayangkat ti contact tracing kadagiti nakapulapol daytoy ken panangi-quarantine kadagiti maseknan.
Kabayatanna, inyunay-unay ni Engr. Dela Peña nga awan pay ti kaso ti Delta variant ditoy Baguio.
Innayonna nga agtultuloy ti panagsagana ti Baguio iti posible a panagngato ti kaso ti COVID-19 no makastrek ti Delta variant iti siudad isut gapuna nga ad-adda a nairtengan ti border checkpoints ken pagalagadan kontra iti COVID-19 ditoy lokalidad.