BAGUIO CITY- Mailukaten ti Kennon Road iti tunggal Biyernes agingga Domingo mangrugi inton November 26, aldaw ti Biyernes.
Maibasar iti desisyon ti Joint Inter-Agency Task Force (JIATF) Kennon, mailukat ti Kennon Road iti tunggal Biyernes iti alas-5 ti agsapa agingga iti Domingo iti alas-5 ti agsapa para LAENG kadagiti lugan a sumang-at iti siudad ti Baguio.
Mailukat met daytoy iti Domingo iti alas-5 ti agsapa agingga iti alas-12 ti parbangn para LAENG kadagiti lugan a sumalog wenno rumwar iti siudad.
Iti panakiuman ti Bombo Radyo Baguio, kinuna ni Frankie Cortez, Chief Operation Section ti Office of Civil Defense-Cordillera a nadesionan ti panakailukat ti Kennon Road kas kiddaw ti lokal a gobierno ti Baguio tapno maksayan ti atiddog a gunay ti trapiko iti quarantine checkpoint sadiay Marcos Highway ken iti triage tunggal weekend gapu iti panagadu dagiti turista a sumangsang-at iti siudad.
Kinunana a nangipatungpal pailaeng ti Joint Inter-Agency Task Force (JIATF) Kennon ti assesment iti sitwasion ti nasao a kalsada idi Nobiembre 20 ken naamoan a natalged daytoy a pagdalyasatan dagiti motorista.
Dinakamatna nga adda ti tallo a quarantine checkpoint a maimuntar sadiay Kennon tapno masurot latta dagiti quarantine ken border controls kas ti panagtungpal dagiti amin a motorista iti 30 kilometers per hour nga speed limit.
Inayonna a nasken a masurot dagiti paglintegan ti trapiko kas ti umno a panagparada ken ti pagalagadan a dagiti laeng lugan nga agdagsen iti lima a tonelada agpababa ti mapalubosan a dumalyasat sadiay Kennon Road.
Impettengna a dagus a mairikep ti Kennon Road no saan a nasayaat ti sasaaden ti panawen wenno adda ti masukimat ti PHIVOLCS a panagaraw ti daga.
