Nakasaganan ti munisipyo ti La Trinidad nga agserbi kas host municipality para iti Adivay Festival a mangrugi ita nga aldaw.
Ti kick-off program ket maangay idiay Capitol Grounds alas diez (10:00)ita nga agsapa.
Iti pannakiuman ti Bombo Radyo kenni La Trinidad Mayor Romeo Salda, nakikoordinardan kadagiti nagduduma a department heads iti nasao a munisipyo ken probinsya ti Benguet para iti pannakaisimpa ti Benguet Sports Complex a pakaangayan dagiti kangrunaan nga aktibidad iti nasao a pasken.
Immuna metten a nangipatungpal ti La Trinidad Municipal Police Station idi laeng kalman iti inspeksyon kadagiti cottages iti nadakamat nga sports complex tapno maipasigurado ti kinatalged ti umili a makidar-ay.
Malaksid iti dayta, sidadaan metlaeng ti lokal a gobyerno ti La Trinidad a gumatang iti tallo a baboy kas kanayunan iti ipaay ti Provincial Local Government a maparti inton November 25 tapno umdas ti taraon a maiwaras kadagiti umili a makipaset iti nasao a pasken.
Maipalagip nga iti napalabas a selebrasyon ti Adivay ket kimmurang ti taraon a naiwaras iti tent ti La Trinidad gapu metlaeng iti kinaado dagiti umili a nakidar-ay.
Kagiddan dayta, innayon ni Mayor Salda a napateg daytoy nga aktibidad tapnu saan a malipatan ti kultura ti yBenguet ken tapnu maiselebrar ti founding anniversary ti nasao a probinsya.
Gapu iti dayta, guyguyuguyenna dagiti umili tapnu makipasetda kadagiti nagduduma nga aktibidad a naisagana kas paset ti Adivay Festival 2024.//Bombo Genzel Depayso
