BAGUIO CITY – Pinatgan ti lokal a gobyerno ti La Trinidad, Benguet ti kiddaw ti lokal a gobyerno ti Baguio City a panakailaylayon ti suspension ti number coding ti La Trinidad para kadagiti taxi units tapnu makastrek sadiay dagiti taxi units nga agtaud iti Baguio.
Iti interview ti Bombo Radyo Baguio, kinuna ni Mayor Romeo Salda nga epektibo ti panakasuspindir ti number coding ti La Trinidad para kadagiti taxi agingga inton tapos, July 31.
Dinakamatna a kabayatan ti nasao a suspension ket tallo nga aldaw iti linawas ti apektado iti number coding ti munisipyo.
Innayonna a kalpasan ti July 31 ket saandan nga ilaylayon ti panakasuspindir ti number coding dagiti taxi units sadiay La Trinidad gaputa adu dagiti agriri kas kadagiti parapubliko a jeep ken dadduma a parapubliko a lugan a saan a mailaksid iti implementasyon ti number coding sadiay.
Sigun pay kenkuana, pinatganda ti kiddaw a panakailaylayon ti panakasuspindir ti number coding ti La Trinidad para kadagiti taxi gaputa imbaga ti lokal a gobyerno ti Baguio nga experimental laeng ti scheme iti panagbiahe a sursuruten ita dagiti taxi units ti siudad.
Inyunay-unay ni Mayor Salda nga adda ti bukod nga ordinansa ti La Trinidad iti number coding dagiti agbibiahe a parapubliko a lugan a nasken a suruten dagitoy.
