BAGUIO CITY – Inaklon ti Jeepney Terminal Inspection iti syudad a narugit dagiti sumagmamano a staging ken loading areas kadagiti jeep iti Baguio City
Iti interview ti Bombo Radyo Baguio ken Wilson Bumay et Jr., manipod iti nasao nga inspection team, agtultuloy ti panagrikrikosda tapnu mapagtalinaed a nadalus dagiti staging areas.
Imbinsana nga idi damo a nagrikos dagitoy ket agarop 80% kadagiti staging areas ket narugit bayat nga in inot met a madaldalusan kadagiti sumarsaruno a panagrikorida dagitoy
Dinakamatna a kaaduan a parikot kadagiti staging areas ket dagiti rugit ti momma ken angot ti isbo
Kinunana met a ballaag laeng iti ipapaayda kadagiti maseknan nga assosasyon dagiti jeep kadagiti makitaanda a narugit nga staging area ken addan dagiti naipaayanda iti second warning
Innayunna nga iti kanito a saan pay nga agtulnog dagiti naipaayan iti ballaag ket irekomendarda laengen daytoy iti City Traffic Management Office wenno iti Barangay a mangsaksakop iti staging area tapnu ikkatenda laengen dagitoy.
Kabayatanna, kinunana met nga agtultuloy iti panangpalagipda kadagiti drivers ken operators kadagiti jeep tapnu pagtalinaedenda a nadalus dagiti staging areas iti syudad.
Maipalagip a nagballaag ni Baguio City Mayor Benjamin Magalong kadagiti public utility vehicles (PUVs) a naipaayan ti tyansa a makapag parada kadagiti lay-bys tapnu agbalinda a responsible para iti umno a panag aramatda iti spasyo a naipaay kadakuada tapnu agparada
Malaksid iti dayta, impangtana pay nga ikkatenna ti nasao nga spasyo ken parking privilege a naipaay kadakuada nu saanda nga agtungpal.
Kasaruno paylaeng daytoy iti agtultuloy a pannakaawat ti Mayor iti reklamo seknan iti kinarugit ti spasyo ken iti panag abuso dagiti jeepney associations iti prebilihyo iti panagparada
