Pimmusay ti tallo nga indibidwal iti napasamak a vehicular accident iti Marcos Highway, Sitio Bontiway, Poblacion, Tuba, Benguet pasado alas cuatro iti parbangon ita nga aldaw.
Iti impormasyon a naala iti Bombo Radyo manipod Tuba Municipal Police Station, nabigbig dagiti pimmusay a da Justine Nichole Fernandez Bungay, agtawen iti 22, residente iti Minalin San Francisco 2nd Pampanga; Homer Lopez Lozano, agtawen iti 46, residente iti Mabical Floridablanca, Pampanga; ken ni Arlene Apilado Nanquil, agtawen iti 56 a residente metlaeng iti Mabical Floridablanca, Pampanga.
Lima(5) met kadagiti pasahero ti nagsagrap iti multiple physical injuries ken naiturong idiay Baguio General Hospital and Medical Center ken iti agdama ket addan iti stable a kondisyon agtultuloy a maob-obserbaran.
Katorse (14) met nga indibidwal pakairamanan iti driver ti nataming itan gapu iti nasagrapda a minor injuries.
Iti agdama, addan ti driver a nabigbig a ni Berlin Lopez iti kustodiya iti Tuba Municipal Police Station-Main Office para iti kanayunan nga imbestigasyon bayat a ti lugan dagitoy ket agtaltalinaed iti agdama a dissona para iti panakaipatungpal iti mechanical inspection ken roadworthiness assesment.
Manarimaan metten ti koordinasyon dagiti otoridad kadagiti pamilya dagiti biktima, kadagiti maseknana a local government units, ken dadumapay a maseknan nga ahensya.//Bombo Newsteam
