Impakaammo ti abogado ni Brice Hernandez a ni Attorney Raymund Fortun nga adda dagiti files iti computer ti sigud a Bulacan 1st district assistant engineer a mangsuporta iti inwaragawag daytoy kontra kadagiti daduma a senador ken manmanday-linteg nga adda ti pakainaiganna iti naanomalyaan a flood control projects iti pagilian.
Sigun kenni Atty. Fortun, kayat nga alaen iti Senate Blue Ribbon Committee ti nasao a computer ngem impettengna a nasayaat nga issurender lattan daytoy iti Independent Commission for Infrastructure (ICI) tapno maipanamnama ti impartiality.
Sigun iti nasao nga abogado, amin dagiti items a mabalin nga ibilang kas ebidensya maipapan kadagiti proyekto kas iti proponent ken ti balor daytoy ket adda iti nasao a kompyuter.
Maipalagip a bayat ti naipatungpal a panagdengngeg kadagiti napalabas a lawas, inakusaran ni Hernandez da Senator Jinggoy Estrada ken Senator Joel Villanueva a nakaawat dagitoy iti 30% a kickback iti agarop ₱1 billion a balor iti flood control projects partikular iti probinsya iti Bulacan.
Mainaig iti dayta, inulit-ulit metten nga indepensa dagiti nasao a senador ti bagbagida manipod iti akusasyon kadakuada nu sadino, nainget a pinaglibakanda daytoy.
