BAGUIO CITY – Pimmusay ti maysa a konsehal ti Tinoc, Ifugao bayat a nadangran ti lima a kakadwana iti panakatnag ti luganda iti maysa a rangkis iti deppaar ti Sitio Mankgew, Barangay Pacso, Kabayan, Benguet, agarup 2:30 ti malem ita nga aldaw, September 5.
Nabigbig ti pimmusay a ni Tinoc Municipal Councilor Mercury Caridad Binwihan, 54-anyos, naasawaan ken residente ti Impogong, Tinoc Ifugao.
Nabigbig met dagiti nadangran a da Norwin Polon Carpio, 34-anyos, residente ti Poblacion, Kapangan, Benguet; Jonathan Wakat Binwihan, 20-anyos, residente ti Impogong, Tinoc, Ifugo; Elsa Tabingan Paeng, 52-anyos, resident of Nabalicong, Buguias, Benguet; Analiza Paeng Carpio, 32-anyos, mannursuro, residente ti Natubleng, Buguias, Benguet; ken ni Leizel Ann Pael Dulnuan, 25-anyos, engineer, residente ti Asin, Tuba, Benguet.
Maibasar iti report ti pulisya, nagtaud sadiay La Trinidad, Benguet ti lugan a pick-up nga addaan plaka a CML 599 nga inmaneho ti konsehal ken paturongda sadiay Sitio Mangkew, Barangay Pacso, Kabayan, Benguet tapnu dumar-ay iti lamay ti maysa a kabagianda.
Nupay kasta, kabayatan ti panagdalyasatda iti pasalog a paset ti kalsada ket saan a nasiputan ti konsehal ti kurba a paset ti kalsada a rason iti panakatnag ti lugan iti rangkis nga addaan kauneg a mapattapatta a 50 a metro.
Dagus a naitaray dagiti biktima iti pagagasan ngem naideklara a dead on arrival ni Councilor Binwihan babaen kenni Kabayan Municipal Health Officer Dr. Felix Mangaltag Jr.
Iti agdama, agpatpataming paylaeng dagiti nadangran iti pagagasan.
Nakaro met a nadadael ti pick-up ken nasarakan a nakasanggir iti maysa a puon ti kayo iti nasao a rangkis.
