BAGUIO CITY – Narugianen idi kalman ti rabii ti clean-up and disinfection drive iti Baguio City Public Market.
Maitunos daytoy iti pammilin ni Mayor Benjamin Magalong kadagiti vendors ken market stakeholders para iti panangisayangkatda iti innaldaw a clean-up ken disinfection drive kas paset ti preemptive aksion kontra iti panagwaras ti COVID-19.
Kangrunaan a dinalusan dagiti maseknan dagiti exposed surface areas partikular dagiti metal hand railings a kadawyan nga ig-iggeman dagiti tattao.
Narugian ti panagdalus idi alas-7 ti rabii babaen iti nagduduma nga stakeholders ti merkado publiko.
Mabalbalakadan met dagiti market goers a leppasenda ti panaggatangda sakbay ti alas-7 ti rabii tapno maipaayan dagiti vendors iti gundaway nga agdalus ken tapno saan dagitoy a masabuagan iti danum a maar-aramat iti panagdalus.
Kabayatanna, pinaglibakan dagiti opisial ti agwarwaras a damag iti social media a maipasidong iti lockdown ti merkado publiko ti siudad ti Baguio ken mapawilan sadiay dagiti sumagmamano a biyahero manipud iti dadduma a probinsia.
