Kiddaw ni Arthus Carlos, kapitan ti Barangay Irisan, Baguio City ti koordinasyon dagiti umili kasta met dagiti nagduduma nga opisyales para iti panagpatalinaed iti linak ken kappia iti nasao a barangay.
Iti panakiuman ti Bombo Radyo kenni Carlos, inyunay-yunayna ti panagtitinulong ti tunggal maysa no sadino rumbeng ti panangireport dagiti maseknan kadagiti “suspicous” a panag-gargaraw.
Kinuna met ti kapitan a kasapulan nga umanurot dagitoy kadagiti nagduduma nga ordinasa ti barangay Irisan kas iti panagtungpal kadagiti curfew time, ti panagala dagiti establishemento ti permits, ti panagtungpal iti schedule ti panagbasura, ti saan a panangibaon kadagiti ubbing nga agibasura, ti panangitali dagitoy kadagiti asoda ken daduma pay.
Kabayatanna, kiddaw pay ti kapitan ti naparpartak a panakaaramid ti baro a barangay hall ti Irisan agsipud ta nabayagen daytoy a narugian ngem saan pay nalnalpas.
Impeksa met ti kapitan ti panagsayangna iti pondo a saan a nausar para iti nasao a barangay hall no sadino naisubli ti agarup P17 million a nakalatang a pondo daytoy iti national government.
Mangnamnama met ni Carlos a malpas a dagus ti baro a barangay hall dagitoy tapno saanda a maabutan ti panagtutudo nangruna ket agtedteden ti agdama a barangay hall dagitoy.
Adda a nagpalagip met ti kapitan kadagiti residente maipapan iti panagsalwad iti salun-at nangruna ita a nabara ti panawen ken ti pangliklik kadagiti anyaman a banag a mabalin a mangitunda iti uram.//M
