Pinatgan ti maysa a korte idiay Valenzuela ni dismissed Bamban, Tarlac Mayor Alice Guo a makipaset iti panagtultuloy ti imbestigasion ti Senado seknan iti iligal a Philippine Offshore Gaming Operators (POGOs) a naituding inton Setiembre 17, 2024.
Daytoy ket kalpasan a nangipatulod ti surat ni Senador Risa Hontiveros iti Valenzuela City Regional Trial Court idi napalabas a lawas a mangkidkiddaw ti presensia ni Guo iti imbestigasion ti Senado.
Maibasar iti surat a sungbat ti nasao a korte, pinatganda ni Guo a makidar-ay iti joint public hearing inton Setiembre 17, 2024 iti oras ti 9:00 o’clock ti agsapa, ken napirmaan ti pammilin babaen kenni Valenzuela City RTC Presiding Judge Elena Amigo-Amano.
Imbilin ti korte iti Philippine National Police Custodial Facility nga itulodda ni Guo iti Senado ken iti PNP Headquarters Support Service tapno maipaay ti nainget a “security protocol” kenkuana.
Ti imbestigasion iti iligal ti POGO ket idadauloan ni Hontiveros kas chairperson ti Senate committee on women, children, family relations, and gender equality.
