Nangipila ti sumagmamano a grupo ken indibidual idi kalman iti petision a mangkidkiddaw iti Korte Suprema (SC) a bilinen ti Kongreso a mangipaulog iti linteg kontra iti “political dynasties.”
Dagiti nagpetision ket pakairamanan ti 1Sambayan, Sanlakas, kameng ti Advocates for National Interest, ken dadduma pay nga indibidual —ken kiniddawda pay iti Korte Suprema para iti Kongreso a maibilang a panangumsi no saanda a tungpalen ti desision ti nangato a korte iti uneg ti makatawen kalpasan a naipaulog daytoy.
Iti uppat a pulo ket walo a panid a petision para iti certiorari ken mandamus, kiniddaw dagiti nagpetision iti Korte Suprema a piliten ti Kongreso a mangtungpal iti Article II, Section 26 ti 1987 Constitution babaen ti panangipaulog iti linteg a mangiparit kadagiti political dynasty.
Nakalanad iti Article II, Section 26 ti 1987 Constitution nga “igarantiya ti estado ti agpapada a pannakagun-od kadagiti gundaway para iti serbisio publiko ken maiparit ti political dynasties.”
Ti “respondents” ket ti Senado nga ibagi ni Senate President Chiz Escudero, ken ti House of Representatives nga ibagi ni House Speaker Martin Romualdez.
