Kabombo kabaelam kadi met a mangipablaak iti ladawan mo iti online kas maysa a criminal mastermind gapu ta maboring ka laeng?
Idiay Northern China, naarestar ti maysa a lalaki nga agapelyido iti Wang kalpasan ti panangipablaakna iti ladawan daytoy a nasuratan iti wanted order gapu ta maboring laeng daytoy iti inaldaw a panagbiagna.
Maibasar iti post daytoy, naisurat ti addressna kasta metten ti maipagarup a kaso daytoy no sadino kinunana a nagtakaw daytoy iti 30 million yuan wenno US$4 million manipud iti maysa a kompanya idi napalabas a bulan.
Malaksid iti dayta, innayonna metlaeng nga iti kanito a mabirukan daytoy ket maipaayan ti makabiruk kenkuana iti 30,000 yuan wenno US$4,000.
Innayonna pay nga ingatangna ti kuarta a tinakaw daytoy iti submachine gun ken lima gasut a bala ti paltog.
Dagus met a nagturong dagiti pulis iti lugarna no sadino ditoy a kinemmegda ngem bayat ti operasyon awan ti nasarakan dagitoy nga aniaman a paltog ken naamuan metlaeng a saan a pudpudno ti pablaakna.
Gapu iti daytoy, nagkiddaw ni Wang iti pammakawan kadagiti pulis ken kinunana a ginandatna laeng daytoy nga aramiden tapno makaawat iti atensyon.
Nupay kasta, kinuna dagiti pulis a maikonsera daytoy kas social disruption ken panangiwaras iti saan a pudpudno nga impormasyon.
