Naarestar ti maysa a lalaki nga agtawen iti 25, awanan iti asawa, ken residente sadiay Km4, Asin Road, Baguio City gapu iti panagtakawna sadiay munisipyo ti La Trinidad itay laeng nabiit.
Ti biktima ket maysa a babae, agtawen iti duapulo ket pito, addaan iti asawa, ken residente sadiay Windyhill.
Maibasar iti report ti pulisya, rinumwar ti biktima iti pagtaengan daytoy tapno makitulong iti preparasyon ti kasar ti kasinsinna.
Kalpasan ti sumagmamano nga oras, dagus nga impakaammo ti nanang ti biktima iti anakna a nakita daytoy nga adda ti lalaki a sinumrek iti kuarto daytoy.
Gapu iti dayta, kinita ti biktima ti kuarto daytoy ken natakuatanna a maaw-awan ti kuarta daytoy a P25,000.00.
Binuyana met ti CCTV footage a naimuntar iti kuarto daytoy ken nakitana ti maysa a lalaki a nakabado iti multi-colored t-shirt ken short a nang-ala iti kuarta daytoy sakbay a pimmanaw.
Impost garud ti biktima ti ladawan ti suspek ken adda ti concerned citizen a nangipakaammo kenkuana iti kinasiasino ti suspek ken no sadino ti pagnanaedan daytoy.
Dagus met daytoy a nagkiddaw iti tulong kadagiti iti La Trinidad Municipal Police Station a nangitunda iti pannakaarestar ti suspek.
