BAGUIO CITY – Nakemmeg ti innem nga indibidual kalpasan ti maysa a drug-buy bust operation nga insayangkat dagiti otoridad sadiay Avelino Street, Andres Bonifacio, Baguio City idi kalman.
Nabigbig dagitoy a da Dan Allen Orpilla Abellera, 37-anyos; Jovan Bambico Genove; Mario Manegdeg Cariaga, 49-anyos, konduktor; Romeo Mendoza Salating, 31-anyos, bus driver; Christopher Carpena Antero, 32-anyos; Ricardo Soliveres Capilitan, 45-anyos ken ni Maria Salvacion Capilitan, 50-anyos, therapist.
Nakemmeg ni Jovan Genove kalpasan nga inlakona iti operatiba ti maysa a pakete ti mapapati a shabu nga agdagsen ti lima a gramo.
Insurona pay kadagiti otoridad ti balay-pagabangan sadiay Avelino Street a pakarekoberan ti buy-bust money ken sadiay a nadanun dagiti operatiba ti lima pay a kakadua ni Genove a manarimaan nga agpa-pot session.
Nakumpiskar manipud kadagitoy ti lima a pakete ti mapapati a shabu nga agdagsen ti lima a gramo ken nagduduma a drug paraphernalia bayat a nakumpiskar pay kenni Dan Allen Abellera ti kanayunan a lima a pakete ti mapapati a shabu nga agdagsen ti lima a gramo.
Sumangsangon dagiti nakemmeg nga indibidual iti kaso a panaglabsing iti RA 9165 wenno iti Comprehensive Dangerous Drugs Act of 2002.
