BAGUIO CITY – Pimmusay ti maysa a lalaki kalpasan a naaksidente ti inmanehona a truck sadiay Marcos Highway, Kadmangan, Poblacion, Tuba, Benguet itay parbangon.
Sigun ken ni Police Major Dominador de Guzman Jr., officer-in-charge ti Tuba Municipal Police Station, biktima iti aksidente ni Cipriano Pudong, 37-anyos, ken residente ti Buguias, Benguet.
Maibasar iti salaysay ti helper ti biktima, kabayatan ti panagdaliasat dagitoy sadiay Marcos Highway ket killaat a naiddep ti makina ti truck.
Dimsaag ti helper ken pinadasna nga ikkan iti kalso ti pilid ti lugan ngem nagdiretso ti truck agingga a naidungpar daytoy iti uppat a lugan a nakaparada iti igid ti kalsada.
Dinakamat ni De Guzman a nagresulta daytoy iti ipupusay ti driver ken nadadael ti paset dagiti lugan a nairaman iti aksidente.
Kinuna pay ti opisial a nagresulta met laeng daytoy iti pannakadadael ti poste dagiti kuryente ken kable dagiti linya ti komunikasion a nagresulta iti pannakapukaw ti suplay ti kuryente.
Kasaruno iti daytoy ket binalakadan manen ni De Guzman dagiti amin a motorista nga agannad dagitoy ken kitaenda a naimbag ti kondision dagiti lugan sakbay ti panagbiahe tapno maliklikan ti aksidente.
