Ngimmato iti 15% ti nailista nga output dagiti mangngalap iti West Philippine Sea manipud tawen 2022 agingga idi napalabas a tawen.
Sigun kenni Presidential Assistant for Maritime Concerns Andres Centino, kas maibasar iti datus ti Bureau of Fisheries and Aquatic Resources, ngimmato iti 201,000 metric tons ti nagbalin nga output dagiti mangngalap iti West Philippine Sea idi napan a tawen.
Immunan a kinuna ti ahensiya a namnamaenda ti panagdur-as ti produksyon dagiti fisheries iti West Philippine Sea nangruna ita a nangrugin ti pannakaipatungpal ti rotational deployment dagiti barko ti pagilian iti Bajo de Masinloc shoal tapno masigurado ti seguridad dagiti mangngalap a Pilipino iti nasao a lugar iti baet ti panangbastos ti barko ti China.
Iti agdama, dumanon iti 385,000 a mangngalap ti agkalkalap iti West Philippine Sea kas paset ti panggedan dagitoy.
