Agtaltalinaed nga umdas ti suplay ti tilapia iti Ambuklao Dam sadiay Bokod, Benguet a maal-ala dagiti mangngalap.
Iti panakiuman ti Bombo Radyo kenni Marx Perfecto, Officer-In-Charge ti Fishery Production and Supports Service Division ti Bureau of Fisheries and Aquatic Resources-Cordillera, dumandanon ti bilang dagiti tilapia iti 800 agingga 1300 tunggal aldaw.
Nupay kasta, agtultuloy ti panagmonitor dagiti kameng ti nasao nga opisina iti production ken mortality dagiti nasao a klase ti ikan kagiddan paylaeng ti mapaspasaran a napudot a panawen.
Kabayatanna, dinakamat ni Perfecto nga iti agdama ket adda paylaeng iti normal ti lebel ti danum iti nasao a dam nupay bimmaba daytoy idi napalabas a lawas.
Innayonna a nakasagana ti nasao nga ahensya a mangipaay ti tulong ken suporta kadagiti mangngalap ti Cordillera kaspangarigan kumaro ti mapaspasaran nga epekto ti El Nino phenomenon.//Bombo Jerwin Aquino
