Mangnamnama ti Baguio City Sports and Development Office a maaramat ken mausaren dagiti light towers ti Baguio Athletic Oval intun Setyembre ita a tawen.
Sigun kenni Honorio Yamoyam, ti kabarbaro a City Sports and Development Officer ti Baguio City, pinadas dan a pinasilawan dagiti light towers kalpasan ti pammilin ni Mayor Benjamin Magalong a rumbeng a maaramaten dagiti silaw tapno maakomodar dagiti sports ken exercise activites uray nu rabii.
Nupay kasta ket naduktalan a naingpis ti kable ti kuryente a naaramat ditoy rason a napuoran dagiti waya (wire) ken saanen a nabaelan a napasilawan.
Gapu iti daytoy ket nagkiddaw da iti tulong manipud iti Benguet Electric Cooperative tapno mang assess dagiti kasapulan a mailatag a kable ti kuryente tapno agbalin daytoy nga operational.
Sigun pay kenni Yamoyam, dumanon iti agarup P60,000.00 ti pundo a mausar para iti light towers.
Maipalagip a nangipaay ti ultimatum wenno deadline ni Mayor Magalong ti maysa lawas kadagiti mangbukbukel iti City Sports and Development Office tapno maaramat ken mapasilawan dagiti uppat a light towers ti Baguio Athletic Bowl.
Sigun iti mayor ket tallo a tawenen ti napalabas manipud naipasdek ti nasao a pasilidad a napunduan ti mano a milyon a pesos ngem agingga iti agdama ket saan pay a naar-aramat.
Nairuar ti nasao a pakaseknan kagiddan iti pannakairekep ti Baguio Athletic Bowl iti alas singko ti malem tunggal aldaw nu sadino awan ti gundaway a maka-ensayo ken makaay-ayam dagiti atleta ken ti publiko nangruna nu rabii.//via Bombo Jordan Tablac
